一年種榧千年香

原創 西坡 海上夢疊

作者：西坡

滬語改寫：邊秦翌

滬語講述：徐輝

審閱、推薦：丁迪蒙

編輯：王乙其

近年來，有些年貨大禮包裡向會得放一罐香榧子。對香榧子勿大熟悉個人，邪氣有可能勿拿伊當樁事體，甚至因為無從落手就乾脆拿伊隨便處理脫了。

勿拿伊當樁事體是勿對個，年貨大禮包裡個物事就數伊個價值最高（傳說一粒優質香榧子個價鈿相當於一隻雞蛋唻）；拿伊隨便處理脫也是勿對個，假使講送撥識貨個人，講勿定人家要回饋儂一隻老大個慕思蛋糕還覺著勿夠，覺著欠了儂個情。

我對定價個依據並勿是邪氣懂，只曉得兩點：一是我小辰光，香榧子搭仔小蒲桃一樣，儕是休閒食品當中個“貴族”，從來就嘸沒便宜過；二是採香榧子要爬到邪氣高個香榧樹浪向（差勿多有得兩層樓搿能介高），幾乎每年儕會有勿幸個訊息傳出。應該講，阿拉吃到嘴巴里個香榧子，儕包含勒一份“交強險”，哪能會得勿貴呢？作興有人會講，葛末等到伊成熟之後、讓伊自家落下來勿可以啊？儂個心腸真好。可惜個是，香榧青果自然落地之時，也是撥山裡向個松鼠吃脫之際，阿里還輪得到儂啊！

勒我能夠記事體個辰光，老家紹興來人，一般總歸要帶四樣土產：梅乾菜、香糕、鹹甜（椒鹽）燒餅搭仔香榧子。其他還算好，就是香榧子個外殼搭仔肉浪向個黑衣實在是忒難剝了，常莊是肉還沒吃到，倒是塞了一嘴巴個“煤灰”，老沒勁個。

一般來講，果實類個物事，勿是吃果肉、譬如橄欖，就是肉核（讀活）兼收，譬如杏子個杏脯搭仔杏仁，棄果肉勿吃而只吃核個，邪氣邪氣少，香榧子可以算得上。交關人只看到過香榧子個“今生”，而嘸沒看到過伊個“前世”，所以無法想象伊“著好衣裳”個樣子到底是哪能介個。簡單來講，伊像煞是粒橄欖，青橄欖，形狀更加接近紅棗。所謂香榧子，有用個是伊個“子”，至於“子”外頭“肉”有啥用場，我也勿清爽，好像是榧農拿“子”挖出來之後，“肉”就立時三刻處理脫了。

香榧子是阿拉國家特有個珍稀乾果，產地勿多，以浙江，尤其是諸暨出產個最有名。我到浙東南一帶行走，路邊頭儕有高聳個廣告牌勒大力推銷香榧子。

香榧，戰國至宋，儕叫伊“柀子”。秦始皇南巡到會稽一帶，吃過“柀子”之後，大加讚賞，賜予嘉名“香柀”。葛末，香柀哪能變成功香榧了呢？有人講因其木紋“斐然有章採”，故謂之“榧”。可惜我嘸沒查到出處，估計臆測個成分邪氣大。

蘇東坡曾經勒杭州做官，對香榧邪氣有好感，伊寫過首《送鄭戶曹賦席上果得榧子》，撥廣為傳誦，詩還是勒彭城（舊是現在個徐州寫個，可見伊對此念念勿忘，給予香榧樹邪氣高個評價。

相傳蘇東坡發明了“東坡豆腐”，但是勒伊個著作裡向嘸沒尋到相關記錄，倒是林洪《山家清供》浪有記載：“東坡豆腐，豆腐蔥油煎，用研榧一二十枚搭仔醬料同燒。”本來我還當是所謂“東坡豆腐”，偽託可能性邪氣大，現在，蘇子推崇香榧且有詩為證，估計“東坡豆腐”是真個，儂勿相信還勿來三唻。

豆腐浪向加香榧子個碎粒，啥人吃過？豆腐高頭加花生米，加杏仁呢？我吃過日本個豆腐冰淇淋，高頭擺點堅果碎屑，相當好吃，想必放香榧子碎屑也應當是勿錯個。

香榧子用於餐飲個機會勿多，宋人做成功椒鹽香榧、糖球香榧、香榧酥咾啥向朝廷進貢，也只是讓皇家吃吃白相相。

《紅樓夢》第二十六回裡向有隻情節：“黛玉道：‘我沒講啥呀。’寶玉笑道：‘撥儂只榧子吃！我儕聽到了。’”嘸沒見識過、吃過香榧子個人對此是莫名其妙個。照我推測，“撥儂只榧子吃”，並勿是真個請黛玉吃香榧子，而是撥伊點小小個懲罰——用上海閒話講類似於“吃只麻栗子”（北方閒話叫爆慄）。《金瓶梅》裡也有類似個閒話：“婦人拿手朝牢仔西門慶面孔彈了只響榧子。”可證。啥道理兩本書儕提到要用“香榧子”來“吃”或者“彈”呢？響搭仔脆是香榧子個要件，所以阿拉吃香榧子，覺著“響”搭仔“脆”是必須個。

勿管是響還是脆，要讓人可以比較便當個剝脫殼去脫黑衣再是重要前提。《清稗類鈔》記了兩種辦法：一用豬脂炒之，榧皮自脫；二用瓷瓦刮黑皮。前者是賣出方要做個事體，後者是買進方要做個事體。顯然，賣方個努力是決定性個。

有位高手透露：拿浸泡過鹽水個香榧，裝進塑膠袋袋裡，燜脫一歇，倒出來炒，頗有效果。承鑫渠兄相告：香榧子一端各有隻黑而狹長個“西施眼”，剝殼個辰光只要用手節頭對準“眼睛”用力一撳，榧殼就裂開來了。我試過，確實有效，但並非“放之四海而皆準”；而且，現在吃香榧子，去衣雖然勿如老底子介難，然而也勿一定“所向披靡”，常莊會得有無名之火升起。

看來，上帝讓人類享受美食，總歸要設定點障礙，吃蟹是搿能，吃刀魚也是搿能，吃香榧子何嘗勿是呢？

作者：西坡

講述：徐輝

——————————————————

丁迪蒙

迪蒙，啟迪矇昧者也。上海市人。原上海大學中文系教師，多年來一直致力於滬語和海派文化的傳承。

滬語是吳方言的代表方言，是吳儂軟語的典範。她既可以用來拉家常，也同樣可以用來朗讀各類詩歌散文。

滬語完全可以書寫，同粵語可以寫作是一樣的。本平臺所有文章都是經過改寫後，用滬語來演繹的，漢字書寫也是正確的。

丁迪蒙所撰寫的，與滬語相關的著作主要有：

《學說上海話》上海科技文獻出版社

《聽聽說說上海話》少年兒童出版社

《實用滬語》復旦大學出版社

《上海話繞口令》少年兒童出版社

《上海方言詞語使用手冊》上海教育出版社

《上海話讀成語故事》少年兒童出版社

《囡囡學童謠》，少年兒童出版社

《囡囡學成語》，少年兒童出版社

原標題：《一年種榧千年香》